一般讲走来写生的，黄昏边沃有篝火活动或者是讲讲鬼故事的，吾倈的篝火活动无空就匄打扑克伉跳皮筋拉爻罢。所以第二日黄昏大家侬只剩落做队讲鬼故事罢。该物色是讲究气氛显的，所以讲房间柢的灯沃着覅开拉，乡下是冇路灯的，窗门外伉窗门底的气氛是一色的，暗里墨洞。凑门前从鬼故事讲起，再讲到坐柢的每个侬，每一个侬的性格沃弗同，有俫偏阴，有俫偏阳，吾也晓弗得吾是偏狃面的，有俫讲吾偏阴，但是吾觉着有时节快活乐笑显的，该个就充分说明吾是个各颓经，性格弗阴弗阳，出世来就是个作细神经的货。一般讲老侬阴气是比较重，尤其是阿公阿婆阿太该倈侬，鬼跟牢显个。还有一倈是性格比较愔静倈的，­
该倈侬一般是一倈媛主儿，侬末比较善份，冇侬伉渠倈嬉的时节，渠倈会单独自呆惰一色，一句话也弗讲，有恁界伉渠倈嬉罢，渠倈讲弗出还晓弗得，断哩儿反应，所以讲该倈侬也是容易鬼跟牢个，就算匄鬼跟牢也晓弗得。上面倈沃是带吾倈走来写生的老师讲的，但是宿该方面吾倈也沃晓得，只是讲争倈讲法，有侬讲末，吾倈也假特恁听听，并且也觉弗着无聊。许个也称称恁讲渠可以逮梦控制牢，还讲自讲可以控制梦的角度，该个还真真神奇罢。
，讲吾倈还冇恁的境界。因为渠是老师，所以渠讲的话有一定的权威性，但是吾倈也只是假装几个相信权威的听客。其实讲该个也弗是宿柢传播迷信，只是讲冇话题讲­，寻倈该倈物事讲讲，还是蛮有趣相的呐。既然是讲鬼故事，最好末是讲自的亲历过罢的故事是最值得听个，所以讲鬼故事该一部分的重头戏当然是该个老师读大学的时节­，宿学堂底妆笔仙的经历，当然吾倈也爱听。渠读大学时节邀请一个女同学伉渠做队玩，该个女的最少着伉渠关系不错新玩起的，该一点是讲不爻的，再讲游戏的成功率也可以打包票喏，如果两个人达不到心有灵犀的程度，妆弗好会出事故的。玩笔仙需要多显多的名堂，好比讲一间阴气蛮重的暗室，还着拉支点起罢的蜡烛，该倈沃是为了逮气氛妆妆好倈。再末还着一张白纸（纸上着写灵清出口伉入口，还有一倈着问渠问题伉回答的乱七八糟的物事）、笔（最关键）等等，最后宿解盘师的指导下，开始念请笔仙的咒语罢，该个冇也弗伉吾倈讲咒语的内容，­渠讲怕吾倈走去妆，请不去爻，闯祸结煞。后柢吾宿网上查着有关笔仙的资料伉视频，许倈咒语其实简单显，伉电影柢的道士请神驱鬼的许倈咒语差不显，吾恁界还记牢一倈：何乜笔仙，笔仙，上通九天……法力无边.晓不得伉渠念的咒语是不是­一色，吾觉着该俫也就眙个瞎“逼”三打广告一色。咒语念好以后，大家侬愔静倈个，参与者可以从头到尾眼珠沃开拉或者合拉，心柢着冇别的想法的，注意力着集中的。该老师讲头一个走出的是渠的前世，是个秀才，客气显，问渠何乜，渠回答何乜，渠讲渠自是清末的一个秀才，科考未考上，屋柢末有老安伉三个娒，一共有五个人，别侬讲“有借有还，再借弗难”，该鬼算好，客客气气走来，客客气气走去，下一次再请也弗怕麻烦。吾眙眙该侬死爻恁早，肯定是科考未考上新想弗开，逮自死死拉爻，该个真还冇责任心，还弗是个阵。接落渠第两个请来的是个娒娒，该鬼还真真奇形古怪，调皮倒去，问渠问题，渠也不乜三四，叫渠打猪渠偏打狗，最后也冇何乜名堂问出，好话末讲爻一大把，新逮渠请转去。一共请三遍，最后一个请来的是个老佬，该鬼手柢捏把棒柱，慢慢恁走来，问渠半日也冇反应，死爻罢一色（晕，该个本身就是鬼呐），再半日新应你一句话，昂你也冇心思听罢，所以只好逮渠请转去。凑门先个娒娒末忒灵泛，该各未死也死弗动，走半日新走归。­