钟嘉欣饰演嘅柳心如，性格执着，最后为陈锦鸿饰演嘅高喆所害，变成妖魔。
无线分三段黄金时段搞「对抗」，八点接《女王办公室》棒嘅，系由李司棋、毛舜筠同黎耀祥嘅《天天天晴》、八点半系《蒲松龄》、九点半就系已播紧嘅《谈情说案》。此外，连深夜都唔放过，依家播映紧嘅《天地豪情》，会喺 6月 11日开始，即系世杯揭幕当日，由播一个钟加长到播两个钟。无线今次以剧集嚟对撼，目标明显，就系要锁住一班师奶 fans。
闲话讲完，切入正题啦。无线今次用马浚伟嚟做对撼世杯嘅武器，虽然有部分人信心不大，但无线亦唔会打冇把握嘅仗。其实马浚伟对撼世杯早有前科， 2002年时，无线就攞佢有份做嘅《洛神》打当年嘅世杯，平均收视都有 30%，相当唔错。难怪马浚伟亦大言不惭话自己系福将。虽然《蒲》古仔好多都耳熟能详，但喺电视上仍属近年少见嘅题材。
《蒲松龄》起锚
今次呢套《蒲松龄》系讲狐仙报恩。马浚伟饰演嘅蒲松龄，同陈锦鸿演嘅捕快高喆系好兄弟，两人都对贪官污吏痛恨不已。一次，两人为咗追查狐仙作怪传言，蒲差啲遭到毒手，好彩及时得陈法拉饰演嘅令狐小翠出手救番。原来小翠就系嚟报恩嘅狐仙。另方面，蒲家为赶制年画，请咗大批女工，其中钟嘉欣饰演嘅柳心如嚟应徵，目的系想搵到当年抛弃佢家姐嘅无赖，因而结识到高喆及蒲松龄。究竟今次马浚伟掂唔掂？就真系要睇剧集吸唔吸引咯。
