举例。
譬如话 「跑酷 」「滴滴租车」之类嘅
我读原音 「跑huk6 dik6dik6租车」嘅话喺日常交谈中甚为突兀，首先因为而家啲人本嚟就唔惯甚至唔识用粤语读书面文嘅喇，你咁样讲人哋会觉得好奇怪（现实如此）。其次，呢啲词语本来创作时就系用普通话嘅，大部分唔都符合粤语人习惯。但系要我读「跑ku1」 「di1 di1打车」嘅话，又有违我嘅原则。
所以我想探讨嘅系，喺日常与一般人交谈时(尤其系同被普通话影响粤语发音嘅人)究竟系读原音呢，抑或折衷读变音呢？
呢个问题甚为普遍，多见於一啲新词汇(普通话)，由於香港冇受呢啲词嘅影响，并且好多翻译词直接读英文，而且香港译名一般唔用大陆译法所以我觉得唔会有呢方面嘅疑惑。再系广州对粤语读音并冇规范，电视媒体基本上读变音(记者主持粤语水平有好有差，缺乏权威)因此呢个问题冇可参照嘅地方，只能够同各位一齐探讨下喇