视帝黎耀祥捱了廿年才有出头，不计柴九和刘醒，大家印象最深刻的，必定是「裏外不是人」的猪精猪八戒。然而，祥仔演过由张衞健及陈浩民主演的《西游记》，由猪精去品评两代孙悟空，最适合不过。
十几年前接拍《西游记》，冇谂过有咁大回响，因为当时TVB同期有另一部大制作，所以宣传资源都落晒嗰套剧，反之《西》剧就冇人理。点知最后爆出系孙悟空，收视口碑都好好，认真始料不及，公司都打咗个突。
《西游记》重点一定系孙悟空，但我觉得猪八戒发挥都好大，平时见我老婆行路似鸭仔咁得意，我咪学佢行路，再夸张十倍，所以大家见到猪精行路其实好似一只鸭，真系好好笑。
拍足二十个钟
不过，拍呢套剧真系好辛苦，每日几乎拍二十个钟，所有戏都讲我哋师徒四人，无论外景、厂景都有江华、健仔、麦包（麦长青）同我。所以我哋四人友谊，都系呢套剧去建立。话虽如此，我哋从来冇话收工食消夜、唱K直落呢啲嘢，都系嗰句啦，每日都拍到天昏地暗，几乎冇咗半条人命，仲边有精力出去蒲？不过，男人嘅友情在心中，呢段日子几个男人走埋一齐，真系几有趣。
两人完全唔同
即使到依家，好多人都讲健仔同浩民做嘅孙悟空有乜分别！有健仔珠玉在前，大家亦对浩民寄望甚殷，所以佢压力真系好大，当时浩民好Fresh，但好多鬼主意，成日会度新桥喺马骝精身上，演出嚟同健仔有好大分别，可以话完全唔同。当然，健仔演出技巧会高过浩民好多，要浩民同佢比，真系有啲为难。